Гӏалгӏай мехка дӏадоладир моттигерча «Абилимпикс» чемпионата дакъа
Наьсарерча сервиса, быта колледжа даькъ тӏа лаьрххӏа йола профессиональни говзала моттигера чемпионат дӏайихьар, могашал эшаеннача наха юкъе «Абилимпикс» яхача проекта чуйоагӏаш. Из проект я «Росси - тароний мохк» яха президентски балха цхьа дакъа. Из лаьрхӏа я доакъашхой вахара, къахьегама таронаш дегӏайоалаяра. Чемпионато вӏашагӏтехар начӏал дола республикан кагирхой, уж ба сага таронаш дагаръяь варгвоацаш дукха хилар хьагойташ, хьинаре къахьегараш.
«Чемпионата чудоагӏаш, тайп-тайпара ха яьннача дешархоша, студенташа, говзанчаша къовсам дӏахьоргба республикан дикагӏа бола балха говзанчаш яха цӏи яккха дагахьа. Керттерча кхелахоша мах оттабергба декхараш кхоачашдаь хиларга, иштта укх заман таронаш лелае харга хьежжа. Яхьашка дакъа лоацаш ва 116 саг, цар гойтаргья шоай балха говзал 24 даькъ тӏа, царна юкъе «Веб-тохкам», «Графически сурт диллар», «Маха баккхар», «Лорий, вахара лостам», иштта кхыдараш. Карарча шера программанна юкъеяхай цхьацца йола кхоллама оагӏонаш. Кхетаченаш дӏахьош цу юкъе хургва 145 кхелахо, 140 волонтёр. Цар таро хулийтаргья из болх дика вӏашагӏболла», - аьлар «Сердало» газетага Гӏалгӏайчен ӏилман, дешара Министерстве.
Чемпионата чуйоагӏаш вӏашагӏъеллаяр балхий ярмарка, иштта говзанча хьехамаш, цар тӏехьара тӏа хьаелл доакъашхошта таронаш. Балхий ярмарко таро лу яхьа доакъашхошта мехка болх лоаттаберашца къамаьл де, къахьегама хьалаш дувца. Иштта говзанча хьехамаш дӏахьош хиларах цар таро хул керда профессеш йовза, шоашта ховш дар говзал йолча хьехамчашца чӏоагӏде.
Цу тайпара из хаттар кхоачашдеш хиларо таро лу яхьан майда пайда эцаш хилийта къахьегама даькъ тӏа. Из лоархӏаме гӏа ба республикан ший тайпара дола дешар дика дегӏадоаладара. Яхьаша хьагойт, доаггӏача беса хьаллоацаш хилча, эшаш дола хьалаш хьакхоллаш хилча, хӏара саг таро йолаш ва дика болхло хила.
