Гӏалгӏай мехка граждански оборонах говзал шаьръеш ба
Гӏалгӏайче дӏаболабелар Ерригроссийски граждански оборонах йола штабной говзал шаьръяра болх. ӏомабалара балхаш даим дӏахьу ардара бетта, сиха оарцагӏъахара йола моттигаш, боахамаш кийча дий тахка дагахьа. Карарча шера уж йийкъай керттерча шин даькъа. Цкъа хьалхагӏа говзанчаша урхаллен балха моттигаш, царна чудоагӏа низаш, цу даькъ тӏара керттера гӏишлош кийчергья. Тӏаккха шоллагӏча даькъ тӏа доакъашхой болалургба юкъедоаладаь декхараш кхоачашде. Из лаьрхӏа да бахархой, республикан доазув хила тарлуча кхерамах сиха кӏалхардаккхара.
«Тахан латташ долча хьалашка диллача, къаман кхерамзле лораяра даим кийча хила безаш ба граждански оборона даькъ тӏа. ӏомабалар дӏахьош, цу гӏулакха малагӏа кийчо яьй гуш хургда, доакъашхоша шоашта хьалхашка оттадаь декхараш кхоачашдарга хьежжа, - аьлар аргӏанара из болх дӏаболабе могадаьча, Россе МЧСа кулгалхочун Куренков Александра дешаш белгалдеш, Гӏалгӏайчен чоалханеча боахама зарбан болх лелабераша.
ӏомабалар лаьрхӏа да лоархӏаме йолча моттигашкара болх цахаддаш дӏабахьара, иштта цӏаьхха чоалхане хьал этта моттиг нийслой, нах кӏалхарбахара болх сиха вӏашагӏболлара. Къаьстта терко тӏайохийт говзанчаша материальни, культуран ганзаш лораяра.
Ерригроссийски болх шаьрбар чакхдаргда, ардара бетта 9-ча дийнахьа. Ерригача урхаллений, царна чудоагӏача граждански оборона боахамий балха мах хоадабеш хургда цу гӏулакха тӏеххьара дакъа. Цо таро лургья кхоачамбоацараш гучадаха, уж юстардахара юкъара хаттараш тахка, яхаш, дийцар «Сердало» газетага.
