«Ишколе даха кийчде бер» яха болам ба вай мехка дlахьош
«Ишколе даха кийчде бер» яха гӏо деш бола болам ба мехка дӏаболабеш. Цу проектага гӏолла, 5000 совгӏа долча бера эшаш мел бола кхоачам чубоалла тӏормигаш дӏадекъаргда. Цу беркатеча гӏулакха юкъегӏоргда боккхача дезалера, таро хала йолча цӏагӏара бераш, иштта дегӏа могашал эшаеннараш, СВО доакъашхой дезал.
«Тахан бер ишколе даха кийчдеш дӏадодар кӏезига ахча дац. Цхьадолча цӏагӏа из хало еце а, кхычарна низткъала хул, эшаш мел йола хӏама эцаш, бер кийчде. Цунга хьежжа чӏоагӏа лоархӏаме да, цу наха ханнахьа гӏо дар, оагӏув хьаллацар. Къаьстта терко е эш СВО доакъашхой берашта. Цар даьй тахан, Даьхен хӏама лорадеш, тӏема аренашка лелача хана, вай цар дезала оагӏув хьаллаца, ишколе болхачарна кийчо е гӏо де дезаш да. Республикерча муниципалитеташка дӏа-хьа лургда портфелаш цар хӏара берага дӏакхоачийтаргдолаш», - язду ший телеграм- оагӏон тӏа вай мехкадас Келаматанаькъан Махьмуд-ӏаьлас. Мехкарча моллагӏча сага дакъа лаца йиш я цу болама юкъе.
Тахан вайна юкъе дукха ба ишколе додача бера дог хьаста, из гӏаддига ловш бола нах. Моллагӏча тайпара гӏо дар лоархӏаме да – тетрадаш, къоаламаш, портфель е кхыйола шийна бакъахьа хета хӏама ийца, цу болама юкъебаха аьттув ба бахархой. Догьийшача, таро хало йолча, дегӏа могашал эшаеннача бера дог хьастар боккха маьл хургболаш хӏама да.
