ГӏалгӀайчен кхоллама болхлочун, пенси ийдара бокъо меттаоттайир
ГӏалгӀайчен керттерча бокъонаш лораечун фусаме дехар дера паччахьалкхен халкъа халхара ансамбла болхлочунгара. Кхаь бера дас белгалдир, ший бокъонаш телхаеш хилар. Цо хоам бир, дӀадахача шера маьтсела бетта дехар дӏачуденнадар шийна пенси хьадоладалийтара даькъ тӀарча Россе Вахара ганзе, яхаш. Бакъда хӀанззалца из хьадоладеннадац.
«Цу сага бокъо тохкаш, сага бокъонех волча викало Россе Вахара ганзе из хаттар дӀадахьийтар. Цо ший болх юха тохкаш теркалдир, дӀадахача шера цу сага дехар чуденна хилар, из саг кхоллама моттигашка болх баь хилар, цо страховой пенсе вахара каьхаташ чуденна хилар. Юххьанца цун каьхаташ кхоачам боацаш хиларах, цу тӀа латташ йола цо болх баь ха белгалъеш дола таьрахьаш нийса цахиларах, пенсе ваха бокъо яц аьнна чӀоагӀдир.
Бакъда тӀехьара тӀа из болх тахкарах, цу сага паччахьалкхен халкъа халхара ансамблашка халача хьалашка болх баь хилар дӀа а лоархӀаш, чӀоагӀдир цо ткъаь шера болх баь хилар. ХьалхагӀа пенси дагӀац аьнна оттадаь сунт юхадаьккхар», - аьлар «Сердало» газетага ГӀР УПЧ хоамий - аналитически даькъ тӀа.
СФР говзанчаша цун кхо бер хилар (зӀамига) дӀа а лоархӀаш, пенси хьадоладалийтар. Цун пенси да 29 938 сом. Цул совгӀа, цунна хьаделар, 2025 шера маьтсела беттагара 2026 шера наджгоанцхой беттага кхаччалца, соцадаь лаьттар а.
