Туризм заӏапхошта гаргайоалаеш къахьег
2026 шера Гӏалгӏайче лаьрхӏа ба могашал эшаеннача нахага туризма хьалаш дикагӏа дӏакхачийта, яхаш, дийцар «Сердало» газетага Гӏалгӏай Республика Кулгалхочун зарбан болх лелабераша.
«Российски Федераце Президента Россе Паччахьалкхенна тӏадиллар, моттигашца цхьана, могашал эшаеннача наха лаьрхӏа туристически хьал тоадар.
Из хаттар балха юкъедоаккхаргда. Дика ӏалама таронаш, культуран моттигаш йолча вай республиканна; из хаттар лоархӏаме да», - аьлар мехка кулгалхочо Келаматанаькъан Махьмуд-ӏаьлас.
Цо белгалдир, хьалхашка оттадаь декхар кхоачашдара, республикан гӏишлой, наькъий таронаш дукха я. ГӏР туристически таронга диллача юкъедоагӏа исторически дагалоаттама моттигашка вугаш дола дика тоадаь наькъаш хилар, кхыча хьалашка кхачара таронаш, хьалаш хилар.
Цу гӏулакха керттердар лоархӏ ӏаьдало хьалаш хьакхоллар, болхлой ӏомабар, хоамашца из хьал ӏалашдар, дукхача наха лаьрхӏа дола наькъаш ӏодахкар.
«Гӏалгӏайчен Паччахьалкхено болх дӏахьоргба, туристически таронашта мах оттабеш, уж заӏапхошка дӏакхачара хьал довзаш. 2026 шера, кӏимарса бетта 1-ча денга кхоачаш кийчъергья, республике даь даьннача балхех йола доклад»,-аьлар Махьмуд-ӏаьлас.
РФ Президента тӏадилла декхар, Мехкадас яхачох, из Гӏалгӏайчен чура, халкъашта юкъера туризм дегӏайоалаяр, балха моттигаш хьакхоллар да, республикан доазон тӏа берригача туристашта безаме моттигаш хургйолаш.
