СВО доакъашхошта, цар дезалашта гӏо лоаттадара тӏехьа дикка къахьега лерхӏ мехка
СВО доакъашхошта, цар дезалашта гӏо лоаттадара тӏехьа дикка къахьега лерхӏ мехка. Из хоам «Сердалога» бир Mехкадаь зарбан болх лелабераша. Цох лаьца дийцар вай Мехкадас «Даьхен лорабой» яхача ганза моттигерча филиала дӏадахача шера кхоачашдаьрех дувцача кхетаче.
«1600 совгӏа саг ва ганзагара гӏо дийхараш, царна юкъера 99, 8% тохкам дӏабихьаб. Бахархошта новкъостал лоаттаду ӏаьдалгара хьадоагӏаш дола ахча хьаэцача, лаьттан доазув къоастадеча, психологически оагӏонца, иштта вахар хаьдача бӏухой гӏулакха тӏагӏолла. Керттердар - наха боаггӏача боараме гӏо дар, царна къувлар фуд тахкар.
Россе Президента Путин Владимира тӏема операци йолаеннача дийнахьа денз белгалдаьд, СВО доакъашхошта, цар дезалашта гӏо дар лоархӏамеча декхарех долга. Тахан вай къаман бӏухой шоай декхараш дизза токхаш, белгалбоалаш латт тӏема аренашка», - дийцар Келаматанаькъан Махьмуд-ӏаьлас. СВО доакъашхошка, цар цӏагӏарча нахага хьажар лакха терко лоаттае езача гӏулакхех долга хов вайна тахан.
Мехкадас ше тӏахьожам лоаттабеш дӏахьош ба цу оагӏонцара болх. Хьалхалаттарашта, ерригача тоабан доккха баркал кхайкадир Мехкадас, шоай декхараш бехктокхаме кхоачашдарах, Даьхе лорае арабаьннарий хӏама эггара лакхе лоаттадарах.
