ЖКХ гӏишлошка хӏанззе а ӏанга кийчо еш ба
Ара ахкан ӏимеца денош латте а, ЖКХ моттигашка ӏанга кийчо еш болх дӏахьош ба тахан. Шелал хьаэттача цхьаккха кхоачамбоацар хургдоацаш, массанахьа хьалххе кулг тохаш ба цу оагӏонцара болхлой. Кхоачашде дезарий хьоггехьа уйла яьй. Республикан кулгалхоша тӏахьожам беш, дӏахьош болх ба из.
«Тахан вай мехка болх беш йӏовхал лоаттаю 6 котельни я. 54 дукха квартираш йолча цӏеношта, иштта 11 вахарца ювзаеннача ӏаьдала моттигашта йӏовхал лоаттаю цар. Котельнешка, иштта цу оагӏонцарча моттигашка тоаде дезараш лертӏа хургдолаш; газ, хий, ток лоаттадеча оагӏонашка, цӏаьхха, хатар хинна моттиг хургйоацаш; къахьегаш ба тахан. Моллагӏа дагадоаца хӏама нийслойя а, деррига кийча хургдолаш дӏахьош болх ба из. ӏан ха гаьна яле а, хьалххе кийчо яь хилар чӏоагӏа лоархӏаме да цу оагӏонца», - яздир ший Телеграм-канале вай мехкадас Келаматанаькъан Махьмуд-Ӏаьлас.
Коммунальни моттигаша деррига чулоацаш, массанахьа шоай ханнахьа кулг тохаро ӏан деношка паргӏатагӏа хулийтаргья.
