Гӏалгӏай мехка сийлен улг оттадир СВО веннача Гетагӏазанаькъан Вахийна
СВО тӏема мугӏаре веннача Гетагӏазанаькъан Вахий сийна, Илдарха-Гӏалий тӏа дагалоаттама кхетаче хилар. Цигарча №6 йолча юкъерча ишколе «Турпалхочун Парта» хьайийллар. Цу лоархӏамеча гӏулакха хьалхаяьлар Гӏалгӏай «Даьхен лорабой» ганза моттигера филиал. Ганза болхлочо Темарханаькъан Ӏийсас кийчъяьча дагалоаттама кхетачене дакъалоацаш хилар турпалхочун гаргара нах, СВО ветеранаш Зангенаькъан Хьусен, Хазанаькъан ӏаьла, Баденаькъан Мухьмад, Темарханаькъан Амир, Мейренаькъан Мухьмад, Хазанаькъан Ювсап.
«Гетагӏазанаькъан Ваха ваьв Шолжа кхале 1994 шера тов бетта 30-чадийнахьа. Ишкола яьккхачул тӏехьагӏа эскаре вахар, цул тӏехьагӏа тӏема гӏулакх дӏахьош хилар. 2024 шера из вахар СВО тӏема мугӏарашка отта, цига денал, майрал гойтарах Денала орден елар цунна, хӏаьта маьцхали бетта 2025 шера из мичав ца ховчарех лоархӏаш хилар. Тахан из дагаух ший Даьхе езаш, из бахьан ший са дӏаденна саг санна. Из парта турпалхо дагалоаттавара бахьан хургда, цох доаккхал а дергда. Цун карагӏдаьннар, цӏи язъяь хургья исторен оагӏон тӏа», - аьлар «Сердало» газетага «Даьхен лорабой» ганзе.
Илдарха-Гӏалий тӏа дагалоаттама моттиг хьаеллар бӏухочун сийдеш да. Цо довзийт лаьрххӏача тӏема операцен даькъ тӏара бакъдар, иштта малхайоаккх, Гетагӏазанаькъан Вахий цӏи цун хьамсарча ишколе, ерригача Гӏалгӏайче.
