Мархий бетта вай мехкарча 5 эзар совгӏа дезалашта гӏо дергда
Вай мехкарча 5 эзар совгӏа болча дезалашта кхачан тӏормигаш декъаш, гӏо дергда укх езача хана. «Сердалога» из хоам бир Мехкадаь зарбан болх лелабераша.
«Вай мехкадас Келаматанаькъан Махьмуд-ӏаьлас тӏадилла, «Мехка сагӏа» яха гӏо деш бола болам дӏахьоргба республике, укх бетта 14-ча денгара 16-ча денга кхаччалца. 25 тонн дулх, 5 эзар совгӏа тайп-тайпара хӏамаш чуйоахка тӏормигаш да мехкарча таро йоацарашта, дукха бераш долча дезалашта, СВО доакъашхошта, цар дезалашта, вахар хаьдача тӏемахой, ӏаьдала болхлой цӏагӏарча наха дӏадекъараш», - йоах тхога бенача хоамо.
Дулхал совгӏа, хьоар, шекар, дуга, даьтта, хурмаш, чай да тӏормигашка. Гӏо де деза нах хоржаш хиннаб «Тешам» яхача ганза доакъашхой, маьждигашкара имамаш, администрацей хьакимаш. Укх безача Рамадан бетта наьха дог хьастар къаьстта доккха, лоархӏаме да.
