СВО ветеран волча Овшанаькъан Тархана гӏо дергда вай мехка
«Даьхен лорабой» яхача ганза мехкарча филиала доакъашхой, Илдарха-Гӏалий тӏарча администраце болхлой, шахьара дарбанчера лораш цхьана болх дӏабахьа арабаьлар. Тӏема аренашка декхараш токхаш хинна, ши бутт хьалха цӏенах кхийтта Овшанаькъан Султана Тархан волча баха хилар уж. Тӏема декхараш кхоачашдеча наькъ тӏа, геттара чӏоагӏа хиннача човнех, шаккха ког боацаш висав бӏухо, карарча хана меттавоагӏаш ва из.
«Ветерана вахара хьал мишта латт хьежар уж. «Даьхен лорабой» яхача ганза филиала хьалха латтача Абаьданаькъан Ислама белгалдир, ӏаьдалгара хьадоагӏаш мел дола хӏама вӏаштӏехьадоаккхаш къахьегаргда шоаш, аьнна. Цул совгӏа, цӏагӏара гӏулакхаш де цунна аттагӏа хургдолаш, фусаме хувцамаш деш болх дӏахьоргба. Овшанаькъан Тархана цӏагӏара наӏара санагӏаш дӏашерде деза, заӏапхочун цӏагӏа да лела аьттув хургболаш, кӏалхара новкъарле ераш дӏадаха деза, «Хьаькъале цӏа» яха гӏирсаш оттадеш болх чакхбаккха беза. Бионически оала протезаш оттаергйолаш, токаца лела дикагӏа йола коляска хьаяйтаргйолаш, эша каьхаташ шоаш кийчдергда филиала болхлоша», - дийцар «Сердалога» цу моттиге.
Шахьарерча дарбанчен керттерча лора гӏонча йолча Умаевгӏар Мадинас шийна дӏатӏаийцар заӏапхо волча хан-ханнахьа лораш ахийтар, цунна терко лоаттаяр.
Администраце болхлоша белгалдир ветерана вахара хьал дика доацилга, чуӏеш вола фусам готта йолга. Цунга хьежжа, вахара хьал аттачахьа даккха гӏо дергда цунна, эшаш дола хӏама ӏалашдергда.
