Гӏалгӏай мехка тоадеш латт Яндар оалача хин хьоарсам
Гӏалгӏайчен ӏалама тароний, экологе Министерство къахьегаш я Яндаре гӏолла ӏодода Яндар оала хий дикагӏа дӏаухаргдола хьоарсам хьакхоллаш. Из хоам «Сердало» газетага бир болх лелабеча боахамо.
«Карарча шера цига къахьегараша 1,9 км даькъ тӏа кхоачашдир хий дикагӏа дlаухаргдола балхаш. Проектах, юкъара дӏалаьрхӏача, цу чура хьалдаьккхад 28,97 эзар куб метр чухийрца лаьтта, цо таро лу хий дикагӏа дӏадахийта, бахача наьха коашка хий чу ца дувлийта.
Деррига а тоаде лаьрхӏа хин доазув 4, 766 км да. Из болх чакхбаьнначул тӏехьагӏа, 155 бахархошта, 28 цӏенна, кхыча вахарца ювзаеннача гӏишлошта кхерамзлен ӏалашо ергья, иштта Яндар хин йистера тӏаьш дола моттиг а чӏоагӏъергья. Ше баьча балха чаккхе ергья Гӏалгӏайчен ӏалама Министерствос 2027 шера», - аьлар хоамо.
«Ший ханнахьа хин йистош цӏенъяр – из лоархӏаме да бахархой кхерамзле лораяра. Юхебиса болх дӏабахьара, ӏалама Министерствос кхайкарал даьд Росводресурсы боахамга, тӏехьара тӏа ахчанца новкъостал дар дехаш», - аьлар хоамо.
