Боккхача дезала вхара новкъостал дара йола бокъо меттаоттайир
ГӏалгӀайчен сага бокъонех волча викалга кхайкарал дир боккхача дезала нанас, берашта хьадоагӀаш хинна цаӀ дола пособи оала ахча соцадаь хиларах, карарча шера кӀимарса бетта денз. Кхалсага яхачох, из соцадара бахьан да, каьхаташ кхоачам болаш цахилар. Бакъда деррига каьхаташ кийчдаь юха чуделча а, Россе Вахара ганзага кхайкарал дича а, хӀама хувцалуш дац.
«Цу кхалсага хаттар цхьан кога тӀа даккхара, сага бокъонех волча викала лаьрххӀа дола каьхат дӀадахьийтар Россе Вахара ганзе, дукхача дезала наьна бокъонаш меттаоттаяр хьадехаш. Массайолча оагӀорахьара болх дӀабихьачул тӀехьагӀа, деррига хьал довзаш хилар. Цига белгалдаьлар цхьацца дола кхоачамбоацараш хилар, технически оагӀорахьара болх нийса цахилар. Дезалера хьал чӀоагӀде дезаш дар, ЗАГСа реестра чубоагӀаш болча хоамаца нийслуш цахилар бахьан долаш.
Иштта белгалдир бера каьхат нийса цахилар, ший йиллача хана, деша дагӀача бера каьхаташ дӀачуденна цахилар. Уж деррига кхоачамбоацараш юстардаьхачул тӀехьагӀа, кхалсага юха чуделар ший каьхаташ, лайчилла бетта 8-ча дийнахьа», - аьлар «Сердало» газетага ГӏалгӀай Республикан УПЧ хоамий даькъ тӀа.
Россе Вахара ганз юха а хьежар цу каьхаташка, цох йоагӀаш йола чӀоагӀо йир. ЦаӀ дола пособи хьахьожадир хӀара бера 2025 шера лайчилла бетта 1-ча дийнахьа денз, 2026 шера ардара бетта 31-ча денга кхаччалца хьадоагӀаш хургдолаш. Из 100% хьадайтаргда тахан вай мехка латташ болча вахара боарамга хьежжа.
