ЕГЭ – 2026 дӏаяла кийчо еш ба дешархой
Цаӏ йолча паччахьалкхен экзаменга кийчо яр керттерча гӏулакхех да тахан мехка. Боаггӏача боараме из гӏулакх чакхдаргдолаш, къахьегаш ба дешара оагӏонца. Аьтинга бетта 1-ча денгара 25-ча денга кхаччалца хургба экзаменашцара керттера болх. Карарча хана цу юкъе чӏоагӏвенна латтараш 3 800 доакъашхо ва. Аттестаци дӏаяхьа аьнна экзаменашта лаьрхӏа итт моттиг кийчъяьй. Хӏама гойта камераш ехка, иштта кхыдола гӏулакхаш кхоачашдаь, кийча я уж моттигаш тахан. Укх шера экзаменаш дӏалуча балха юкъе дегӏа могашал эшаенна дола 500 бер хургда. Цар гӏулакха къаьстта кийчо яьй цига.
«Ер шу доладелча денз, керттерча ӏилмаех экзаменаш дӏаялара балхага кийчо еш хилар мехка. Дакъа лоацаш хиннараш 2300 саг вар. Хоамий оагӏонцарча кхерамзлен балхага кийчо еш, 1200 саг ӏомавеш болх дӏабихьаб вай мехка. Берашца, иштта цар даьшца, ноаношца болх дӏахьош ба тахан, психологически оагӏонцара гӏо деш ба, иштта «цахаддаш телефонаш» я болх беш.
Экзаменаш дӏалуча моттигашка лораш хургба, дерригача хӏаман кийчо яьй. Чӏоагӏа лоархӏаме да хӏара бер экзамен дӏаяла паргӏата, сахьувзаш доацаш хьадар, шоай кхетама хьал боаггӏача боараме дӏагойта аьттув хилар. Дог тийша ва со кердача наькъ тӏа гӏа боаккхаш бола вай дешархой цу гӏулакхах дикка чакхбаргба аьнна», - яздир мехкадас Келаматанаькъан Махьмуд-Ӏаьлас ший Телеграм-оагӏон тӏа. Цу оагӏонцарча министерстве белгалдир, таханара керттера декхар; хӏара бера цхьаккха кхерам, хало йоацаш; экзамен дӏаяла аьттув балар долга. Карарча хана цу гӏулакхага кийчо еш, из деррига довзаш да вай бераш.
