Йоалацарча балха инспектора кхел еш дола дош хьакхайкадир
Мехкарча Россе Кхалешта юкъерча ИФНС №1 йоалацарча паччахьалкхен балха воккхагӏа волча инспектора духьала хьадийллача гӏулакхага гӏолла, къоастам беш хилар Магаса кхален суд. РФ УК 2-ча даькъа 292 ст.бехктокхаме озаш ва из саг.
«Судага гӏолла дӏабихьача тохкамах гучадаьлар, 2021-ча шера бӏаьстен хьалхарча бетта шийна болча аьттонна из бокъо толхаеча тайпара хьайзалга. Наьсарерча цхьан моттигага хьожаш, федеральни бокъо толхаеш, кхоачамбоацараш юкъедолийтад цо. Хӏама къоастадар цхьаккха саг воацаш, е видеоца дӏа ца яздеш дӏадихьад. Ше гӏалатвалар къайладахьа лаьрхӏа, шин сага хьалхара шийгара кулг яздаьд цо каьхаташ тӏа.
Бокъо йоацача тайпара оттаяьча цу протоколага гӏолла мехкарча Россе ФНС болхлоша коммерчески моттиг юридически оагӏонцарча Цаӏ йолча паччахьалкхен реестра юкъера дӏаяьккхай. Бизнесмений бокъо йохаеш, паччахьалкхен хӏама харцача новкъа оттадеш хӏама хилар цох», - дийцар «Сердалога» мехкарча Прокуратуре.
Гӏалатваьннача инспектора кхоабаш зӏамига ши бер хилар теркаме лоацаш, 120 эзар сом гӏод техар цунна судо. Ахча паччахьалкхен гӏулакха дӏачугӏоргда.
