Ер шу доладелча денз, 167 наркотикацара зуламаш гучадаьхад вай мехка
Наркомани яхача доккхача зулама духьала къовсам лоаттабеш, ӏаьдала болхлой вӏаштӏехьадаьннарех дийцар вай мехкадас Келаматанаькъан Махьмуд-ӏаьлас. Ер шу доладелча денз, МВД болхлоша гучадаьккхад цу оагӏонцара 167 зулам. Къаьстта йоккха терко лоаттаю интернета оагӏонашка гӏолла из бӏеха базар лелаяра. Укх шера мехкашта юкъера из дохьаж лоаттадеш йола йиъ моттиг дӏакъайлай, иштта кхо кхийла гаргга наркотикаш хьаяьхай.
«Эггара керттердар цу балха юкъе, наркотикаш хьачукхухьаш, йоаржаеш йола моттигаш йохаяр да», - аьлар мехкадас. Таханарча дийнахьа полице, прокуратуран, ФСБ тохкама оагӏон болхлошца, наркотикашта духьала къовсам лоаттабеча комиссеца цхьана дӏахьош болх ба из.
Мехка кулгалхочо маьждигашкара имамаш къонабарашта цу оагӏонцара хьехам лоаттабара, из мел доккха зулам да хьалхадоахаш хилара тӏахьех: «Наркомани яхача бӏехача зулама духьала къовсам вай массане лоаттабе беза. Иштта мара бахархой хӏама лоралургдац вайна».
