Ӏалам лорадара даькъ тӀа кхоачамбоацараш гучадаьннад
Илдарха-ГӀалан прокуратуро тӀахьожама болх дӀабихьар «Экохозстрой» яхача компане балха, из я лаьттах пайда эцара дола балхаш тохкаш. ТӀахьожама болх дӀахьоча юкъе кхоачамбоацараш гучадаьлар гонахьара Ӏалам лорадара даькъ тӀа, яхаш, дийцар «Сердало» газетага цу боахаме.
«Ховш хилар цу компане цӀаьхха хаоттам хувцабеннача хьалашка болх бе безаш хуле, зе доалаш йола хӀамаш аракховсаш долча гӀирсашта инвентаризаци яь йоацилга. Иштта «Экохозстрой» гӀишло хиларах тарра, учёте оттаяь хилара каьхаташ дац, экологически тӀахьожам лелабеш бац», - аьлар хоамо.
Цу тайпара, шахьара прокурора 10 административни гӀулакх хьадийллар компанешта а цу хьакимашта а духьала. Уж кхоачамбоацараш юкъедаьннад экологически дӀадехар леладеш цахиларах, шоашта гонахьарча Ӏалама зе деш йола хӀамаш арахецарах бола мах дӀацабаларах.
Цул совгӀа, компане генеральни кулгалхочун дӀадахьийтар уж кхоачамбоацараш юкъера дӀадаха дезарах хоам беш дола каьхат. Прокуратура дӀахо а хьожаргья цигара хьал мишта латт.
