Бархӏ бетта гӏашлой бехках шозза дукхагӏа нийсъелар ДТП
2026 шера наджгоанцхой-маьцхали бетташка Гӏалгӏайче гӏашлой бехках 12 авари нийсъелар – уж шозза дукхагӏа я дӏадахача шера цу юкъа хиннарел. Виъ саг велар, из деррига а нийсделар баьдъенначул тӏехьагӏа. Цох дийцар Гӏалгӏай Республикан Госавтоинспекце урхаллен кулгалхочо Зурабанаькъан Султана, республикан «Кхерамзлен болх дӏабахьар» яхача пресс-конференце къамаьл деш.
Ерригаш а республике бархӏ бетта 155 ДТП хилар. Веннараш 34 саг ва, 214 човнаш яь ва. Эггара дукхагӏа нийслуш дола из хатар, машинаш сиха лехкаш хиларах, духьаларча машина наькъ тӏа бувларах, сабаре цахиларах да. Цул совгӏа, Госавтоинспекце терко тӏайохийт кхерамзлен тӏехкараш дӏа ца тохаш хилара.
Цу даькъ тӏа гӏашлошца профилактически болх дӏахьош ба. «Кхерамзлен болх дӏабахьар» яха кампани лаьрхӏа я берашта, дешархошта, студенташта, ӏомалуш болча водителашта. Царна лаьрхӏа кийчъяьй спектаклаш, интерактивни семинараш, викторинаш, наькъа хьовзамаш нийсденна моттигаш гойтара масалаш.
