Россе байракха Денна хетаяь бӏаь совгӏа кхетаче хургья вай мехка
Россе Паччахьалкхен байракха Денна хетаяь кхетаченаш дӏаяхьарах дувцаш хилар, паччахьалкхен кулгал деча Сластенин Владимира дӏайихьача лоархӏамеча кхетаче. Миннаца хьалха латтача Мизенаькъан Руслана хьоахадир цу цӏайна хетаяьча программаца республике дӏабахьа лерхӏача балхах.
«Укх бетта 17-ча денгара 22-ча денга кхаччалца йолча хана 100 гаргга кхетаче хургья мехка. Цу юкъе да концерташ, гойтамаш, кхоллама сайренаш, викторинаш, исторически сахьаташ, кагирхой боламаш, кхыдараш. Белггалара чулоацам бола программаш кийчъергья муниципалитеташка, культуран, дешара моттигашка. Къаьстта терко йир 22-ча дийнахьа дӏаяхьа лерхӏача керттерча кхетаченашта.
«Цхьанкхетара триколор» яха болам хургба Магасе – Заьзганаькъан И. цӏерах йолча проспекта тӏа, российски триколора лента доаржадергда. 500 гаргга саг хургва цу болама юкъе дакъа лоацаш», - дийцар «Сердалога» мехкарча паччахьалкхено.
Россе Паччахьалкхен байракх айергья цу дийнахьа 100 метр йолча Барта гӏала тӏа, иштта 3003 метр лакха болча Маьтлоам тӏа а йоаржае лерхӏ цхьаькха йоккха байракх.
