Берий инфекционни моттиго ший болх дӏаболабир
Берий инфекционни оагӏоно ший болх дӏаболабир тахан мехка. РФ Президента Путин Владимира юкъеяьккхача «Унахцӏено» яхача къаман проектага гӏолла дӏабихьа боккха болх ба из. Из хоам «Сердалога» бир унахцӏенон гӏулакхех йолча мехкарча Министерствос.
«Инфекционни лазараш дола бераш хӏанзчул тӏехьагӏа боккхийбарий республикерча дарбанче кхувла дезаргдац. Лазараш дӏа-хьа ца даржийтара а чӏоагӏа лоархӏаме да из. Зӏамигача берашта къоастаяь боксированни оала палаташ, лаборатори, реанимаци, иштта кхыдола мел эшараш да цига», - йоах тхога бенача хоамо.
«Берий могашал лораяр тахан вайна массанена хьалхашкара лоархӏаме декхар да. Берашта дарба деш болча лорашта; къаьстта доккха баркал ала, цар оагӏув хьаллаца лов», - белгалдир мехкадас Келаматанаькъан Махьмуд-ӏаьлас.
Дӏадахача шерарча оагӏой бетта федеральни, региональни рузкъах хьахьожадаьр 244 млн сом ахча да. Цу моттиге мел эшаш бола кхоачам эцаш, болх йистебоаккхаш дӏадахийта ахча да из.
