Диъ бер кхедеча наьна бокъонаш меттаоттайир
Онкологически лазар хиларах ӏӏӏ-ча тоабан заӏапхо йолча диъ бера наьнагара дехар кхаьчар сага бокъонех волча викалга. Дегӏаца лазар хиларах, диъэ бер юкъелоацаш, пенси айде ший аьнна каьхат чуденнад цо, бакъда цу оагӏонцарча болхлоша ши бер мара юкъедахийтадац. Цул совгӏа, доккхагӏа долча бера 18 шу кхаьчача, ӏотӏатеха хиннар а ӏодаьккхад. Цо белгалдечох, из хӏама бокъо йоацаш леладеш да.
«Сага бокъонех волча вай мехкарча викала Россе Вахара ганза болхлошка гӏолла дикка хьатехкар из хӏама. Дӏабихьача балхах гучадаьлар цхьацца цу оагӏонцара кхоачамбоацараш, пенси къоастадара гӏулакх харцахьа хиннилга. Диъ берага хьожаш хинна ха а юкъеяхийтар пенсена, иштта 18 шерга кхачанза долча берашта тӏагӏолла пенси айдеш болх чакхбаьккхар», - дийцар «Сердалога» УПЧ.
Таханарча дийнахьа кхалсага пенси 21 366 сом да. Цу юкъе да лазар хиларах дола пенси, иштта хӏара бетта заӏапхо хиларах хьадоагӏаш дола ахча. Цул совгӏа, бокъо йоацаш соцадаь лаьтта, цунна доагӏаш хинна 75607 сом ахча хьадала оттабир уж.
