«Шолже - Горагорск - МагIалбик» яха никъ тоабеш болх дIабихьар мехка
«Шолже - Горагорск - МагIалбик» яха никъ тоабеш къахьийгар мехка. 22, 8 километрага кхоачаш болча наькъа хьал тахан кхыча тайпара да. Республикера машиний наькъаш тоадарах йолча паччахьалкхен программага, вахарерча гIулакхех йолча къаман проектага гIолла дIабихьа болх ба из. РФ Президента чIоагIонца йоаржаяь проекташ я уж.
«Из никъ вай респбликанна лоархIаме ба. ӏ00 эзар совгIа адам даха МагIалбик, Шолжа- Шахьар вIаший хотташ никъ ба из. Эзар гаргга нах ба хIара дийнахьа цига гIолла дIа-хьа ухараш. Шахьара, юртий моттигаш вIаший хотташ никъ ба из. Шолжа-Шахьарерча 2,5 км кхоачача Энгельса, Слепцовски оалача урамашкара болх йиллача ханал хьалха чакхбаьлар. Шахьара бахархошта къаьстта лоархIаме моттиг я из. Энгельса ураме гIолла Осканаькъан Сулумбика цIерах долча доазонга, паркага, культуран ЦIенга, иштта кхыйолча лоархIамеча моттигашка кхоач. Из урам тоабе безарех ба, яхаш, бахархоша теркалду дикка ха яр. Iалама гIулакхех йолча министерствонна тIадиллад аз укхаза 10 эзар совгIа га дIайогIа, аьнна, иштта кхыйолчаминистерствоша а хьаллаца дезаш гIулакх да из. 5 эзар гаргга га дIаегIа баьннаб карарча хана, гурахьа дIахохьоргба из болх», - яздир вай мехкадас Келаматанаькъан Махьмуд-Iаьлас ший телеграм-оагIон тIа.
Республикерча наькъий хьал меттаоттадеш, болх ба мехка дIахьош. Цу юкъе да «ГОК – ГIайрбик-Юрт – СоагIапче», «МагIалбик – Махьмад-ХитIе», «Илдарха-ГIала - Яндаре», «СурхотIе - Алхасте», иштта Нурадилова цIерах болча ураме гIолла МагIалбике кхоача никъ. Республикан кулгалхочо тахан белгалдечох, ӏ миллиард сом совгIа ахча да цу гIулакха хьакъоастадаьр.
