Галашкара кашамаш тоадаь даьлар
Галашкара кашамаш тоадаь даьлар. Из болх дӀабихьар «САФМАР» ганзо хьаллоацаш. Болх чакхбалара хетаяьча кхетачене дакъа лоацаш вар ГӏалгӀайчен кулгалхо Келаматанаькъан Махьмуд-Ӏаьла.
Республикан Кулгалхочун, Паччахьалкхен зарбан болх лелабераша яхачох, карарча шера цу тайпара балхаш дир республикан юртий 20 кашамашка, цу юкъе яр Илдарха-Гӏала, Пхьилекъонгий-Юрт, СурхотӀе, Эккажкъонгий-Юрт. ХьатӀадоагӀача шера лаьрхӀа хинна деррига кашамаш тоадара балхаш чакхдаргда.
«САФМАР» ганзо аргӀ-аргӀагӀа дӀахьу ГӏалгӀай мехка из лоархӀаме болх.
Доккхий балхаш дӀахьош вай республике 2023-2026 шерашка 100 кашамаш тоадаь хургда царех 90 бусалба, иштта 10 кераста наьха», - аьлар ГӏалгӀайчен кулгалхочо Келаматанаькъан Махьмуд-Ӏаьлас, цо тӀатехар, бейна нах дӀабохкар боккха лерхӀам болаш долга.
Белгалду, уж доацаш а кхыдола балхаш дӀахьош я из ганз вай мехка; гӀалай моттигаш, исторически сийленгаш тоадеш, иштта цо дакъа лоац республика дегӀайоалаяра дола хьалаш хьакхоллаш.
«ГӏалгӀайчен берригача бахархошкара, къаьстта сайгара аз дег чура баркал оал Сафарбика Микаила, цо иштта дукхача наха новкъостал дарах», - аьлар Мехкадас.
