ГӏалгӀай мехка хилар «Кхетам балара керда духлохам» яха кхетаче
Вайцига чакхъяьлар шин дийнахьа дӀахьош хинна «Кхетам балара керда духлохам» яха моттигера кхетаче, из вӀашагӀъеллаяр кхетам балара даькъ тӀара паччахьалкхен политика кхоачашъяра чуйоагӀаш, яхаш, хоам бу «Сердало» газетага цу моттигера.
Кхетаче дӀахьош, моттигера кхетам балара программа кхоачашъяра мах оттабир.
Ше къамаьл деш, «Бералла наькъаш» яхача проекта болх лелабеча Колой Саӏида белгалдир, карарча хана, кхетам балара даькъ тӀара болх дӀахьош 136 хьехамча хилар, уж ба берий юкъарлон бувзамашца цхьана болх лелабераш.
«Кулгалхой, хьехамчаш - уж балха даькъ тӀара хьал хувцара новкъостал деш йола болхлой таронаш я. Укх шера 2000 кхетаче дӀайихьай, цу юкъе дакъа лоацаш хиннав 80 000 ишколай, СПО дешархой. ДукхагӀча урхалленашка болх беш я берий боламий Центраш, ишкола музейш, спортивни клубаш, иштта лорий центраш. Цо, шеко а йоацаш, таро елар болх кхыча боарам тӀа баккха», - аьлар Колой Саӏида.
Магас-Шахьара лицея-берий беша кулгалхочо Гӏазданаькъан Адас ший таронех дийцар; культуран, дешара, спорта даькъ тӀа шоай уж толамаш даха йиш хиларах доаккхал а деш. Цу юкъе ба тахан къона 750 къона хьиннардараш.
Эккажкъонгий-Юртарча №2 йолча ишкола кулгалхочо Овшанаькъан Танзилас дийцар ший профессиональни наькъа истори, цо ший балха новкъостий дог ураоттадир кхы а дукхагӀа толамаш дахара.
Даьй-ноаной юкъарлон викала Иленаькъан Мадинас ший къамаьл хетадир дешара, дезала юкъера бувзам хила безара. Цо белгалдир, Сийлахь-боккхача Даьймехка тӀем тӀа Котало яьккха 80 шу дизача шера кхетаче дӀахьош хилар, иштта ГӏалгӀайче хьалхарча Ерригроссийски, Москве дӀахьош йолча даьй-ноаной комитета съезде дакъа лоацаш хилар.
Культуран оагӀув хозъеш яр «Тӏаргим» яха ансамбль, цун кийчо яьраш Наьсарен кхален кулгалхочун хьехамчаш бар, иштта «Бералла наькъашцара» Гимн а дӏааьлар.
Юххера, дикагӀа кийчо яьча хьехархошта, иштта Эккажкъонгий-Юртарча №2 йолча юкъерча ишкола болхлочун Овшанаькъан Танзилайна совгӀаташ делар, из котъяьлар «Шера хьехамча» яхача лаьрххӀача даькъ тӀа.
