«Стрела» яха театр доагӏаргда вайцига
Москван юхерча Жуковскера театр кхоачаргда вайцига, ший спектаклаш гойта. Боккхийбарашта, иштта берашта лаьрхӏа спектаклаш хьокхаргья цар укх гурахьа. «Йоккхий гастролаш» яхача Ерригача Россе проектага гӏолла дӏахьош болх ба из тахан. Россе цу оагӏонцарча министерствос, РОСКОНЦЕРТо моттигашта юкъера бувзам чӏоагӏбеш, хьаллоацаш гӏулакх да из.
«Берригача дезала лаьрхӏа программа я кхаь дийнахьа дӏахьоргьяр, тов бетта 22-ча денгара 24-ча денга кхоачаш. Хьалхарча дийнахьа «Теремок» яхача фаьлгаца хьаелларгья гастролаш. 11 сахьатагара сахьат даллалца хургба 3 шерал доккхагӏа долча берашта лаьрхӏа бола фаьлг. Шоллагӏча, тов бетта 23-ча дийнахьа 11 сахьатагара диъ сахьат даллалца Чуковски Корнея йоазонех «Муха-Цокотуха» яха фаьлг хьокхаргба цар. Тов бетта 24-ча дийнахьа боккхагӏбарашта, кагирхошта лаьрхӏа Гоголь Николая «Мертвые души» яха спектакль гойтаргья 11 сахьатагара диъ сахьатага кхаччалца. Золкин Сергей ва цун режиссёр», - йоах «Сердалога» берий театрера кхаьчача хоамо.
«Стрела» театр вай мехка кхачар, культуран оагӏонцара бувзам чӏоагӏбеш хургда. Укх шера бӏаьстен хана вай паччахьалкхен театр хиннад Жуковске даха. «Къамаьл деш йола кӏудал», «Цхьанна хӏамах ма кхера, Зураб», «Ди тохар» яха спектаклаш гойтар вай актёраша цига. Кхоллама оагӏонцара бувзамаш чӏоагӏдара тӏехьа лоархӏаме гӏулакх да из.
