СВО ветеранашца кхетаче хилар, «Даьхен лорабой» яхача ганза мехкарча филиале
Тӏема аренашка лозабарах заӏапхой болча СВО ветеранашца, цар цӏагӏарча нахаца кхетаче дӏахьош хилар «Даьхен лорабой» яхача ганза моттигерча филиала хьалха латта Абаьданаькъан Ислам. Хӏара бӏухочун къувлараш, цар вахарера кхоачамбоацараш довзаш хилар из.
«Къаьстта терко еш дийцар кхетаче, ветераний цӏеношка, квартирашка цар дегӏа хьалага хьежжа хувцамаш деш, керда гӏирсаш оттадеш хьал аттачахьа даккхарах. Цу оагӏонцарча проектага гӏолла заӏапхой болча ветераний цӏагӏара гӏулакхаш де аьттув хургболаш, къахьега деза. Иштта дийцар ветеранаш балха увттабарах, лорашка ханнахьа чакхбоахаш, эшаш дола дарба лоаттадарах, санаторе салаӏа, дегӏа могашал меттайоалае ахийтарах.
СВО ветераний цхьаккха хаттар, дехар терко йоацаш дутаргдац филиале. Хӏара моттигага гӏолла тохкам беш, цар хьашташ кхоачашде, оагӏув хьаллаца хьожаргба Герзашцарча низех йолча Министерствоца бувзаме болаш», - йоах «Сердалога» ганза филиалера кхаьчача хоамо.
Филиала кулгалхочо теркалдир, ветеранашца иштта юхьдухьала волаш къамаьл деш хилар лоархӏаме долга. Тӏема аренашкара заӏапхой хинна цӏабаьхкача турпалашка хьожаш, массахана царна терко еш хила беза мехка. Абаьданаькъан Ислама белгалдечох хӏара ветерана хьашташ кхоачашдеш, болх дӏахьоргба филиало.
