Путин Владимира «Гуччахьарча къамаьлах» дийцар вай мехкарча КСВО штабе
Укх бетта 19-ча дийнахьа «Гуччахьара къамаьл» даьча Россе Президента Путин Владимира белгалдир, тӏема операцен доакъашхошта, иштта цар цӏагӏарча наха терко лоаттаяр таханарча дийнахьа эггара лоархӏамеча декхарех долга. Из хьаллаьцар вай мехкарча Даьхен Лорбой дезала Комитета хьалха латтача Эсамарзанаькъан ӏалаудина.
«Путин Владимира даьча къамаьлах вай кхетаду, тӏема доакъашхой гӏулакха, цар дезалашка хьажара юстара ца дусилга. Боаггӏача боараме из болх дӏабахьа гӏерташ къахьегаш ба тахан мехка.
Паччахьалкхен кулгалхочо белгалдир, ӏаьдалгара хьадоагӏаш дола ахча хьаэцар, ветерана цӏи лелаяр, иштта кхыдола гӏулакхаш а цхьаккха духьале йоацаш чакхдоалаш хила дезилга. Тахан республикерча КСВО штаба кулгалхочун декхараш кхоачашдеш волаш, Президента деррига хаттараш доашхаш даь къамаьл лакха лерхӏам болаш да. Гуш да-кх, тахан Даьхен гӏулакха арабаьнна латтараш мехка лоархӏилга.
Тӏема операце доакъашхошта, иштта цар цӏагӏарча наха эшарашка хьажар, цар вахарера кхоачамбоацараш меттадоаладара тӏехьа къахьегар бӏаьха, боккха болх ба, хӏаьта из лакхача боараме чакхбаьккха хила беза».
