Гӏалгӏай мехка дика толамаш даьхар дӏадахача шера дешара даькъ тӏа
Гӏалгӏайчен дешара даькъ тӏа, дӏадахача шера дика толамаш даьхар. Кхетаче дӏахьош Гӏалгӏайчен кулгалхочо Келаматанаькъан Махьмуд-ӏаьлас дийцар, мехка дешара министраца Цхьорой Ахьмад-Башираца, дешархой аттестацех лаьца, дийша баьннараш кийчбара болх лакхача боарам тӏа латтилга цо хьагойташ хиларах, яхаш, хоам бу «Сердало» газетага Гӏалгӏайчен Кулгалхочун, Паччахьалкхен зарбан болх лелабераша.
«Цаӏ йола паччахьалкхен экзамен дӏалуш дакъа лоацаш хилар цхьайтта моттиге 3,5 эзар саг; цо хьагойтар дика хьалаш вӏашагӏдехка хилар. Керттера толам бар кхоачамбоацараш юкъе нийсденна цахилар: экзамен дӏалуча моттигера саг араваккхар санна дола гӏулакх лаьгӏделар 96 моттигага кхоачаш. Цул совгӏа, 2,5-зза кӏезигагӏа дар йиллача ханал хьалха, могашал цахилар бахьан долаш, экзамен юкъахйитар, хӏаьта гӏулакх суде чудалар, цу гӏулакха нийсхо лехаш лоткъамаш дар шозза кӏезигагӏа дар»,- аьлар хоамо.
Шера даьхача керттерча толамашта юкъе да, бокъонца долча ӏилманцара безам совбоалаш хилар, лакхара баллаш дахар. Информатика хержар 301 дешархочо, физика - 243 сага, хӏаьта 178 доакъашхо юкъевоагӏаш хилар «лакха баллаш дарий клуба», уж бар 90 балл лакхагӏа бараш, республикан 9 сага лакха мах оттабир - 100 балл, дошо майдилгаш яьхараш дукхагӏа хилар 50 саг, уж ба берригаш а 257.
Мехка кулгалхоша лоархӏ, цу тайпара дешара хьалаш дикача оагӏорахьа хувцадалара бахьан да, дешара даькъ тӏа шоай болх дегӏабоалабара даим терко тӏайохийташ хилар.
«Хӏара таьрахьа тӏехьа латт, хьехархочун боккха къахьегам, даьй-ноаной сатем, берий дешарцара безам - цо таро лу толам баккха», - аьлар республикан кулгалхочо дешара даькъ тӏа даьхача толамех дувцаш.
