Францерча лораша дӏатӏаэца ца тига унахо толамца эттӏайир вай ИРКБ
Ха яхача кхалсага чӏоагӏа хала лоархӏаш йола операци еш хилар вай мехкарча ӏоахашканаькъан ӏ. цӏерах йолча дарбанчера лораш. 71 шу даьннача кхалсага керта хьаьца массехк дестам хиннад. Нейрохирург вола Гӏазгиренаькъан ӏумар хьалхаэтта дӏайихьай из хала лоархӏаш йола операци.
«Унахо ха яха хиларал совгӏа, массехк лазар дегӏаца долаш яр – диабет, гипертони, иштта дог а дика доацаш. Из бахьан долаш тигадац Францерча лораша из эттӏае. Дарбанче ӏочуйоалаеча хана, аьрда кулг, ког тхьайса латташ яр унахо, керта хьаьцара дестам чӏоагӏа хиларах. Керта лакхера тути хьалъийца, доккха дестам дӏадаьккхар лораша. Вӏалла а дага ца хиннача тайпара меттаера унахо: эттӏаяьча кхоалагӏча дийнахьа кулг, ког хьоаде могаш яр из. Из хоам «Сердалога» бир вай мехкарча цу оагӏонцарча министерстве.
Онкологически диспансере химиолучевой терапи дӏахьош я из тахан. Цу гӏулакхо хьагойт ИРКБ нейрохирургически оагӏонцара лораш лакха говзал йолаш болга.
