Дегӏа могашал эшаеннача СВО доакъашхошка хьожаш ба Илдарха-Гӏалий тӏа
Тӏема операце ветеранаш, лораш гулбенна: шахьарерча мэре дӏайихьача кхетаче дийцар, дегӏа могашал эшаеннача СВО доакъашхошта дӏахо дарба лоаттадарах, боаггӏача боараме царна терко ярах. «Сердалога» из хоам бера «Даьхен лорабой» яхача ганза кулгалхочун гӏонча йолча Джанхотанаькъан Мадинайгара.
«Шахьарерча администраце гулбир ганза болхлоша Илдарха-Гӏалий тӏарча дарбанчен керттерча лора гӏонча Умаевгӏар Мадина, терапевтически оагӏон кулгал деш йола Тӏоманаькъан Аза, лор-терапевт йола Мержой Зарема, иштта СВО ветеранаш Темарханаькъан Рашид, Темарханаькъан Амиран, СВО доакъашхочун йиша Осканаькъан Аза. Тӏема аренашка декхараш кхоачашдеш дегӏа могашал эшаенна болча ветеранашта, боаггӏача боараме дарба дӏахьош, терко лоаттаярах дийцар кхетаче», - йоах тхогарча хоамо.
Хӏара бӏухочун дегӏа хьалага, цун хьалхашкарча кхоачамбоацарашка хьежжа, дарба дӏахьоргдолаш чӏоагӏдир гулбеннараша. Иштта цига белгалдир, могаш боацачар малагӏча моттигашка гӏолла чакхбала беза, цу гӏулакха мел ха къоастае еза.
