Илдарха-Гӏалий тӏара нах баха моттигаш тоаеш латт
Шахьара куц тоадарах йолча проектага гӏолла, Илдарха-Гӏалий тӏара моттигаш тоаеш ба тахан. Из хоам «Сердалога» бир мэре зарбан болх лелабераша.
«Бахархошта юкъе дӏадихьача хоржамашка гӏолла эггара хьалхарча оагӏонца тоае езача моттигех ба аьнна къоастабир Осканаькъан цӏерах бола урам (Нефтяной оалача урамгара Рабочи яхачунга кхаччалца), Дьякова оала урам (Кирова оалача урамгара Революционни оалача урамга кхаччалца), Первомайски оала урам (Осканаькъан цӏерах болча урамгара Дьякова оалача урамга кхаччалца), Гӏулой цӏи лелаю урам (Осканаькъан цӏерах болча урамгара Бачаланаькъан цӏи лелаеча урама ӏотӏаотталца). Шахьара да вола Дидиганаькъан Ахьмад болх мишта дӏахьош ба тахка ваха хилар. Къаьстта йоккха терко, тӏахьожам лоаттабу деррига а боаггӏача боараме кхоачашдара», - йоах тха газетага бенача хоамо.
