Къаман программага гӏолла, берий беша тӏабода никъ тоабир Илдарха-Гӏалий тӏа
Берий беша юхера Гӏулой цӏерах бола урам тоабеш хилар Илдарха-Гӏалий тӏа. Керда асфальт ӏобиллар цига. Къаман программага гӏолла дӏахьоча балхашта терко еш бола «Цаӏ йолча Россе» доакъашхой никъ миштаб хьожаш хилар.
«Шахьарерча моттигий куц тоадара тӏехьа лоархӏаме болх ба тахан дӏахьошбар. Партийни десанто хьалхагӏа теркалдаьдар цу ураме хувцамаш эшилга. Цу хана никъ тоабеш баьхкар цига. 2026-ча шера Илдарха-Гӏалий тӏа тоае езача моттигашта юкъе ба из урам», - дийцар «Сердалога» «Цаӏ йолча Россе».
Никъ тоабеш бола болх боаггӏача боараме дӏабихьабий хьожаш хилар единороссаш. Къаьстта терко йир берий беша юхерча моттига. Машинашта санна, берашта, ноаношта кхераме боацаш, паргӏата хила беза из никъ, хӏана аьлча хӏара ӏуйрийна, сайрийна цига гӏолла дӏа-хьа аха безаш ба уж.
