Илдарха-Гӏалий тӏа бизнес лелаяр къайлагӏа хургдоацаш, болх дӏахьош ба
Илдарха-Гӏалий тӏа дӏа ца лоархӏаш йиса коммерчески моттигаш йий хьожаш болх дӏахьош ба. Шахьара мэре говзанчаш юкъе бола балха тоаба, йоала инспекце болхлой, къахьегама инспекце викалаш цхьана бахар, аргӏанара рейд еш, моттигерча мах бара даькъ тӏа из хьал мишта латт хьажа. Цу наькъа уж хьежар розничный мах беш йолча моттиге. Из я Промыслови, Осканаькъан урамашка.
«Комиссе доакъашхой хьежар цар каьхаташ кхоачам болаш дий, шоай доалахьара хӏама леладеча предприятеш дӏаязъяьйий, болхлошта къахьегама договораш оттадаьдий, тӏахьожама-касса техника, эцархочун лаьрхӏа йола моттиг йий. Из болх дӏахьош цхьацца дола кхоачамбоацараш гучадаьлар, царех йола материалаш тӏахьожам лоаттабеча ӏаьдала викалашка дӏайохьийтаргья. Шоай доалахьара хӏама леладерашта довзийтар мах барах, йоалах дола закон», - аьлар «Сердало» газетага Илдарха-Гӏалан администраце.
Тхоца къамаьл даьчо яхачох, цу тайпара тӏахьожама болх дӏахьоргба каст-каста, из лаьрхӏа ба йоала гӏулакхаца цар бувзам лелабара, бахархой къахьегама бокъонаш лораяра, шахьара хьалаш тоадара моттигерча бюджете хьачудоагӏар дукхагӏа хилийтара.
