Илдарха-Гӏалан чухьа, нах дӏа-хьа кхувлаш, автобус хургья
Илдарха-Гӏалий тӏарча моттигашка гӏолла бахархой дӏа-хьа кхувлаш, автобус йолайолийтаргья. Шахьара мэре дӏайихьача кхетаче дийцар цох лаьца мехкарча Минавтотранса машинашца дувзаденнарех болча оагӏонна кулгал деча Котаганаькъан ӏумара, республикерча БДД УГИБДД МВД тӏахьожама оагӏон воккхагӏа вола инспектор волча Тиймарзанаькъан Заьлмахас, иштта кхыбараша. Кхетаче дувца оттадир керттера ши гӏулакх.
«Илдарха-Гӏала - Магас» яха, иштта шахьаре гӏолла нах дӏа-хьа кхувларгбола автобусаш йолаялийтарах дийцар гулбеннараша. Йоккха юкъ ялалехь, чакхъяккха езаш проект я из. Шахьарерча администраце, дукха ха йоацаш, йолаялийтаяр шахьаре гӏолла леларгйола автобус; бакъда Минтранса дезача тайпара болх дӏахьоргбола саг коравагӏац автобус лелае.
Шоллагӏа хаттар, шахьаре лела машинаш сеца тӏеххьара моттиг Эбарга-Юрта ӏотӏаоттача доазон тӏа дӏаяхьарца дувзаденна дар. Джабагӏанаькъан – Цӏечой урамаш вӏашкаоттача яьяр шахьара мэре автобусаш сувцаш йола моттиг. Бахархой кердача моттигашка аха раьза бацар.
Ассоциацена юкъе чубоагӏаш бола нах дӏа-хьа кхувлараша белгалъяьча моттиге сувцаш хургба хӏанзчул тӏехьагӏа. Из гӏулакх лерттӏа дӏагӏоргдолаш ГИБДД болхлоша рейдаш дӏакхухьаргья. Керда ши автобус йолаялийтарца дувзаденнараш даьшхар кхетаче гулбеннараша.
