Къам мехкахдаккхара хетаяь кхетаче дӏайихьар кхолламах йолча колледже
1944-ча шера саькура бетта вай къам боацача бехках мехках дохадаь гаьнарча, хийрача Казахстане ӏодахьийтарах дувцаш, кхетаче дӏайихьар Паччахьалкхен кхолламах йолча колледже. Из ди вай дегашта цӏаккха а дицлургдарех дац! Даьша, ноаноша текха ӏазапа денош вайна даиман духьаллаттаргда.
«Белхарой Райхьант яр «Даьй лаьтташкара ӏобахьийтар» яха кхетаче дӏахьош хиннар. Студенташта дийцар хьаьнала къахьегаш, шоай хӏама тоаде гӏерташ баьхкача вай даьшта тӏакхеллар йоккха харцо хиларах, цхьан дийнахьа уж шоаш мел ӏоадаьча хӏамах бахарах.
Уж хала денош текхараша дийцараша кердадаьхар цига. Белгалдир, дерригача хӏамах бохабаь Даьхенах баьхаболлашехь; шоай ӏадаташ, культура, истори лорадеш гӏалгӏай чакхбаьннилга; яхь ца йохкаш, юха цӏенах кхийттилга», - яхаш, хоам бу «Сердалога» цу моттигера.
Кхетаче чакхйоалаш хьехархочо теркалдир; денал, яхь йолаш халача деношта духьаллаьттача даьйх доаккхал деш, царна тӏакхаьчар диц ца деш; баха безилга, къонабарашта къаман истори довза дезилга.
