Искусствай колледже «Лоархӏаме къамаьл» хетадир дипломата балха
Массахана дӏахьош дола дешара кӏира дӏадоладелар Гӏалгӏайчен Паччахьалкхен искусствай колледже «Лоархӏамеча къамаьлаца», цун къаьгга халкъашта юкъера белгало ювцаш. Кхетаче дувца оттадаь дош дар дипломати - из я халкъашта юкъерча гӏулакхех йола эггара лоархӏаме тема. Дипломата професси - эггара эшаш йола, халкъашта юкъера гӏулакхаш леладеш йола професси я. Цига берашта кӏоаргагӏа довзийтар дипломат малав, из малагӏа хаттараш кхоачашдеш ва.
«Геттара безам тӏабодаш дар дипломата болх, искусства балха даькъ тӏарча оагӏонца нийсбар. Студенташта хьалхашка оттадир цун цхьатарра йола балха оагӏонаш лахар. Художника ший сурт дуллаш бесаш леладеш санна, хӏаьта музыканта- оазашка, дешай цхьанкхетара оагӏонашка санна, дипломата а ший керттера уйла дӏайовзийт дешашца, кулга оамалашца, цхьацца болча ший тайпарча хоамаца. Оаха дийцар, халкъашта юкъерча политике малагӏа дакъа лоацаш я искусство. Артисташа, каст-каста фестивалашка, гойтамашка дӏахохьу шоай мехка мах бараш, культуран программаш. Цу тайпара хиларо таро лу халкъашта юкъера мотт кхетабе, шоайла леладеча гӏулакхех кхеташ хила. Оркестре хӏара музыканта хозаш хул ший лоалахо, из хьож цунца нийса лакха, оаз цхьана яхийта. Иштта, халкъашта юкъерча даькъ тӏа а да - дӏа-юха деш дола къамаьл хозаш хиларга хьажжа мара толам баккха йиш яц, юкъера боарам нийсбе, массане а пайда эцаш из къамаьл дӏадахьа», - аьлар «Сердало» газетага Тутайнаькъан Х.
«Лоархӏаме къамаьл» хиларах пайда ийцар хургболча культуран болхлоша. Искусство, дипломати цхьан майдилга ши оагӏув я. Уж хьож къамаьл дӏадахьа, шоайла кхета, хьакхолла.
