Магасе массазара наркотикашта духьалара хьехама болх дӏахьу
Магас-Шахьара администраце дийцар наркоманена духьала къовсам лоаттабара болх дӏабахьарах. Из хоам «Сердало» газетага бир столицан мэре.
«Наркотикашца къовсам лоаттабара кхела кхетаче хилар, цига дакъа лоацаш вар ГӏР керттера лор-нарколог Ваделанаькъан Жамбулат, иштта Магас шахьаре гӏолла йолча Россе МВД полице отдела даькъ тӏара викал. Цига дийцар шахьарера хьал, дӏаязбаь латтача нахаца бе безача балхах», - аьлар хоамо.
Массане цхьа барт болаш белгалдир; хинна даьнначул тӏехьагӏа къовсам лоаттабечул, хилалехь соцадича аттагӏа да моллагӏа зулам, аьнна. Кагирхошца каст-каста болх дӏахьош хиларо таро лу царна кхетам бала, уж нийсача наькъ тӏа баха.
Шахьара ӏаьдало, цунна чуйоагӏача моттигаша бахархой тӏахьийхар сакхетам лакхбеча, наркомани юхатохача шоашкара дакъа лацара.
