Магасе ӏаьдало мах оттабир доал деча даькъ тӏарча хьала
Магас-Шахьара мэра декхараш кхоачашдеш волча Тиймарзанаькъан Муса хьежар керттерча урамашкара, шахьара юкъарча доазонашкара хьал миштад, яхаш, дийцар «Сердало» газетага столица мэре.
«Шахьара администраце сквер йолчара дӏаболабир ший болх. Къаьстта терко тӏаяхийтар кафе йолча, сквера гонахьарча моттига. Мэра хьалхадаьккхар кафе даьна, цу даькъ тӏа лостам бара бартчӏоагӏам оттабе безилга, иштта санитарни хьал тоадарца бувззабенна. Цул совгӏа, цунна хьалхадаьккхар дакъа лаца дезилга сквера кхуркхолг тоабеча, шахьара хоза куц хьакхоллача», - аьлар хоамо.
Тиймарзанаькъан Мусас белгалдир, шахьара болхлой а юкъе болаш юстардаха деза цхьаццадола кхоачамбоацараш. Из ца хилча даргдоацар да архитектурни кеп хилийтара, урамашка латташ йола нувхаш чутувсаргаш цхьатарра хургйолаш, къаьнаръяраш дӏа а яьха, кердаяраш оттаяра, иштта кхы дӏаходола балхаш дара. Цул совгӏа, кӏоагаш дӏакъовлаш никъ тоабергба Заьзганаькъан Идриса проспектах.
Керттера терко шахьара кулгалхочо тӏаяхийтар паччахьалкхен гӏишлон гонахьарча доазон хьала; цул тӏехьагӏа белгалдир цига де дезар, тротуара плитка цӏенъяра, тӏера бӏехал дӏайоаккхаш, кхуркхолга цхаралаш дилара, из массахана хоза а тешшаме болх беш а хургболаш.
Уж деррига декхараш дӏаделар, йоагӏаш йолча моттигий болхлошта, цу даькъ тӏа шоай ханнахьа болх дӏахьоргболаш..
