Дешара оагӏонцарча ахчанца дувзаденнарех дийцар Магасе
Мехкарча дешара моттигашкарча кулгалхошца кхетаче дӏахьош хилар Магасерча дешара моттиге. Дувца оттадаьрашта юкъе дар ишколашка моллагӏа хӏама эцаш долча ахчанца дувзаденна гӏулакхаш йоккха терко лоаттаеш дӏакхахьар; берашта кхача лоаттабара, мехкадас Келаматанаькъан Махьмуд-ӏаьлас белгалдаьраш кхоачашдара болх боаггӏача боараме, цхьаккха кхоачамбоацараш доацаш хилийтарах.
Кхетаче дакъа лоацаш бар мехкарча рузкъан оагӏонцарча моттигий болхлой. Из хоам «Сердалога» бир дешареи ӏилмани гӏулакхех йолча министерстве. «Министерствонна кулгалдеча Цхьорой Ахьмад-Башира белгалдир, ишколашка, берий бешамашка дӏакхухьаш мел бола ахчанца бувзам бола болх цу оагӏонцарча тӏахьожамах йолча моттигаша лакха терко лоаттаеш болга. Цу оагӏонца дувзаденнараш доашхаш къамаьл дир кхетаче. Оттаяьча моллагӏча чӏоагӏонах цар жоп дала дезилга белгалдир министра. Болхлошта алапи дӏадалара болх цӏена, боаггӏача боараме хила беза.
УФАС кулгалхоша, кхоачам эцара балхах йолча паччахьалкхен Комитета болхлоша белгалдир; ишкола, берий беша кулгалхошта моллагӏа кхоачам эцара балхаца шоаш гӏо де, де дезар хьалхадаккха кийча болга. Тӏехьагӏа цхьаккха кхоачамбоацараш гучадаргдоацаш эшаш да из»,- йоах тхога бенача хоамо. Кхоачашдаьрех, кхоачашде аьнна тӏадехкарех йола протокол оттайир кхетаче. Хӏара кӏира тӏахьожам бергболаш ба цу балха. Цо белгалду, цу чӏоагӏонца дувзаденнараш боаггӏача боараме дӏадахьар вай мехка лоархӏаме долга.
