Магасе дийцар, Гӏалгӏайчен лоаме дегӏайоалаеш де йиш ярех
Гӏалгӏайчен Жӏайрахьа кхале шу чакхдаьлар дегӏаахара дикача толамашца, яхаш, хоам бу «Сердало» газетага Гӏалгӏай Республикан Кулгалхочун зарбан болх лелабераша.
«Дика гаьнаяьннай гӏишлошъяра проекташ. Чми-Тӏаргим бода итт километр хиллал бола никъ тоабаь бала боалл; хьалдаьд Жӏайрахье культуран Цӏа, «ӏарамхи» курорта тӏабода никъ кердабаьккхаб. Цунца цхьана кхоачашдаьд вахаре эггара чӏоагӏагӏа эшаш дар - пхи километр совгӏа керда хий чудиллад, цо дӏадаьккхад хицара хьал во хилара хаттар. Массайолча вахара моттигашка, вӏаштардаьча цӏеношкара бӏеха хиш дӏауха моттигаш тоаяьй, уж хьаеш я вай республике. Цу тайпара балхаш дӏахьош да доалахьарча даькъ тӏа», - аьлар мехка кулгалхочо Келаматанаькъан Махьмуд-ӏаьлас, баьча балхах дувцаш.
Цо иштта белгалдир экономически даькъ тӏара хьал: «Жӏайрахьа» производства парке «Кавдоломит» предприяте даькъ тӏа керда проекташ кхоачашъеш хилар - кхера, жагӏа боаккхаш, минеральни хий шушашка чудотташ йола оагӏув я из.
Вахара-экономически дегӏаахара даькъ тӏа, укхаза дукхагӏча туризм я белгалйоалар. 2025 шера Жӏайрахьа хозал яйра 6000 хьаьшанна, цу юкъе дукха ба республикан бахархой а, шоай хьамсарча лоамашка салаӏа ловш бола.
Терко лоаттаю Цӏай-Лоам оалача лоаман даькъ тӏа беш латтача гӏишло яра балха, из лаьрхӏа я 100 сага салаӏа моттиг хургйолаш, иштта дӏахьош да 57 моттиг йола хьаьшашта лаьрхӏа цӏа хьадара балхаш, цун мах ба 1,7 млрд сом. Цул совгӏа, дӏачуденнад ворхӏ зӏамига цӏа.
«Из доазув дегӏадоаладеш доккха дакъа лаьцад «Сафмара» дикача гӏулакхий фондо. Йистеяьннай тоаяь «Аьрзи» яха берий лагерь, из я укх замах хила езача кепара. Гӏалай комплексаш меттаоттаеш болх дӏахьош ба - 220 гӏалаш йола моттиг я кхы а тоае езаш», - аьлар республикан Кулгалхочо.
Керттера терко лоаттаю Гӏалгӏайчен лоаме физически культуран, спорта, кхетаченаш дӏаяхьара.
«Каьзи» альпинистий лагере мехка тайп-тайпарча моттигашкара спортсменаш гуллу. Цхьан шера 20 совгӏа культуран, спорта кхетаченаш дӏайихьай.
Белгалду, СВО доакъашхой дезалашта, уж бахача моттигашка дӏа а ухаш, эшачунца новкъостал лоаттадеш хилар, цу юкъе коммунальни, лорий дешаш долаш.
Хьачудоагӏача ахчо хьагойт, из болх дика дӏахьош хилар. Бюджете хьачуда дезача 64,6 млн сома меттел, 70 млн сом хьачуделар. НДФЛ даькъ тӏара пайда 106%, доалахьа леладечох йоал яккхарах - 106%, доалахьардар леладарах - 142%, лаьттах - 246%. Бюджетни организацеш декхарийла яхаяц»,- аьлар Келаматанаькъан Махьмуд-ӏаьлас, кхален декхараш кхоачашдарах ше дувцаш.
Цо белгалдир, Жӏайрахьа кхалене ӏалама йоккхий таронаш, мах бола исторически тӏехьале хиларах, таханарча заман проекташ вахара юкъеяха йиш хиларах. Цу гӏулакха керттердар - дӏадоладаьр юхацасоцадар, керда толамаш доахаш хилар, болх дика вӏашагӏболлар.
