Магасе хьаеллаш я «Росси - са истори» яха дӏа-юха лела исторически парк
Тахан Магасерча Алане майдан тӏа хьаеллаш я дӏа-юха лела, исторически «Росси - са истори» яха парк, цо хьалхара гойтаргда Гӏалгӏайчен бахархошта, хьаьшашта таьрахьий кепара мехка истори. Из проект хьакхеллар гуманитарни проектий Ганзо, Россе Президента Путин Владимира тӏадиллача декхарах. Дӏаяхача ханашкардар дикагӏа гойтара, хӏаранена довзаш хилийтара, из болх вӏашагӏбеллараша цига хиннарашта лаьрхӏа дика программа кийчъяьй, из бахьан долаш из хьаеллача дийнахьа цига бокъонца дола цӏай хургда массаболча дезалашта, яхаш, дийцар «Сердало» газетага Гӏалгӏай Паччахьалкхене.
Кхетаче хьабаьхкача хьаьшашта гургба, Российски паччахьалкхе оттача хана хинна керттера исторически оагӏонаш ювцаш, лакхача технологей мультемедийни гойтам, цига гуш хургба исторически лоархӏаме хьалаш хьакхоллаш хинна нах. Из парк хьаеллаш, кхоллама коллективаш хургья, цар тоадергда из цӏай кхы а сийрдагӏа хургдолаш. Цига геттара чӏоагӏа сатувсаш йолча оагӏонех цаӏ я, «Дӏаяха ханаш» яха интерактивни хьаькъале турнир, цига хӏара сага таро хургья шийна фу хов хьажа.
Къаьстта терко ергья, цу программа чудоагӏаш, моттигерча ноахалашта. Дешархой, студентий таро хургья Россе йоккха тӏехьале йовза, учебникашка гӏолла а доацаш, интерактивни экранашка гӏолла. Цига дакъа лаца бокъо я вай бахархой, хьаьший.
