Магасе хьалъеш я мехктохкама музей, филармони
Гӏалгӏайчен культуран, туризма министр Лаьнанаькъан Залина хилар Магасе хьалъеш латтача филармоне, мехктохкама музея гӏишлон балхага хьажа яха. Уж ши гӏишло федеральни инвестицей программанна чуйоагӏаш хьалъеш я. Лаьнанаькъан Залинас, цо кулгал деча министерствос из гӏишло хьалъяра болх тӏахьожам беш лелабу, уж каст-каста хул цига.
«Сердало» газетага ма аллара, Госфилармони хьалъяра болх йистебаьннаб 70%. 11 эзар квадратни метр йолча цхьан тхов кӏала хургья 847 сага лаьрхӏа йоккха, иштта академически 100 сага лаьрхӏа йола концерта ши зал. Генеральни гӏишлонхочо Овшанаькъан Мухьмада яхачох, говзанчаша инженерни балхаш чакхдаьхад. Хӏанз цу моттиге карт еш я, доазув чулоацаш, бӏаьсти болхлоша дӏаболабергба гӏишлон арахьара болх. Россе къулбехьен концерта майдашта юкъе эггара толашагӏа хургья из гӏишло, цига дӏаяхьа таро хургья йоккхий фестивалаш.
Цунца цхьана, Гӏалгӏайче хьалъеш я мехктохкама музей. Гӏишлонхой керттера болх дӏаболабаь, чуийнна къахьегаш ба цига а. Шозза вӏаштара яь керда гӏишло йистейоаккхаргья 2030 шерга кхоачаш, из я 7 414 квадратни метр. Цига хургья лаьрххӏа гойтамаш дӏадахьара моттиг, меттаоттадара пхьоалле, библиотека, 220 сага лаьрхӏа кхетачений зал.
Культуран министра Лаьнанаькъан Залинас ма аллара, цигарча балха хӏара денна тӏахьожам лоаттабу дикал зувш, эшача хьалашца ӏалашо еш. Из хьалъяро республикан искусство, туризм дегӏайоалаяра керда таронаш хьакхолларгья.
