Магасе дӏадихьар «Кванториум технопарка говзанчий хьехамаш
«Марем» гимназе, «Кванториум» берий республикански технопарка викалаша говзанча хьехамаш дӏадихьар. Кхетаче дакъа лоацаш хилар аьхки салоӏаш дола бераш.
«Дешархошта бокъо елар аэропилотироване тӏа болх бе, уж хьежар из мишта лелаю; цул тӏехьагӏа, цар таро хилар бокъонца йола дронаш лелае, царна яйзар уж лелаяра бокъонаш. Электрониках говзанча хьехамаш дӏахьош, бераш ӏомадир токаца лелаеча зӏанарий хьалаш миштад, уж сенна эшаш я а хайра.
Шоай хьехамчаша кулгал а деш, цар ӏомадир токаца схема вӏашагӏйоллар, цунца хьаллотаде йиш я сердал луш дола гӏирсаш», - аьлар из болх беш хиннараша.
Робототехника урока тӏа бераша шоай хьалхара «Катапульт» робот вӏашагӏъеллар. Из болх дӏахьош царна хьалдаьккхар механизма балха керттердар, уж иштта ӏомабелар робота программировани е. Программа вӏашагӏъелла яьнначул тӏехьагӏа, доакъашхой бӏаргаго таро хилар шоаш гулдаьча гӏирсаша мишта болх бу.
«Цу тайпара дешар дӏахьош хиларо берий технически таронаш йоаржаю, кердача проекта болх дикагӏа ӏомабу, шоайла тоабашца цхьана беш бола болх дикагӏа дӏахьу. Баркал оал «Марем» гимназена бувзам лела барах, технически кхоллам безаш хиларах», - аьлар республикански «Кванториум» яхача берий технопарке.
