Халкъашта юкъерча доттагӏала клуба доакъашхошта лаьрхӏа яхь дӏайихьар Магасе
01.07.2026 09:56
Магасерча кагирхой цхьанкхетара Цӏагӏа Халкъашта юкъерча доттагӏала клуба доакъашхошта юкъе яхь (брейн-ринг) дӏайихьар. Из хоам «Сердалога» бера цу моттигера.
«Кхетама таронаш дӏагойтарал совгӏа, шоашта тоабанца болх бе хар дӏахьокха дезаш, геттара кадай, уйла сиха еш хьовза безаш бар доакъашхой цу дийнахьа. Дунен мехкех, цар культурех, ӏадатех, географех, иштта кхыдарех дувца дезаш хилар къонабараш. Берригаш раьза болаш, хӏаравар дог айденна волаш, чакхъяьлар яхь. Дукха хӏама довза, вӏаший бувзам чӏоагӏбе аьттув бар из доакъашхошта», - дийцар тхога кагирхой цхьанкхетарий Цӏен болхло волча Томбенаькъан Исмаӏала.
Ловзаш хиннараша шоаш белгалдечох, дикка пайда боаржабеш, керда нах бовзийташ, вӏаший доттагӏал тоссаш моттиг хилар цох.
