«Толама жӏака тӏа» яха ӏилманца, техникаца ювзаенна республикан фестиваль хилар Магасе
200 совгӏа дешархочо дакъа лоацаш йола «Толама жӏака тӏа» яха ӏилман, техникан республикански фестиваль дӏайихьар Магасе. Из хоам «Сердалога» бир «Кванториум» яхача берий технопарка администраце.
«Магасерча лицее-берий беша, мехкарча 30 ишколера дешархой гулбелар. Лакхерча классашкарча дешархоша конференце бархӏ оагӏонца шоай ӏилман проекташ йоаржайир. Проекташ робототехника, программировани, экологи, биохими, иштта вахара оагӏонцара кхыдараш юкъелоацаш яр. «ӏилма къонача ӏилманхочун бӏаргашца» яхача яхье-гойтаме шоай эггара хьалхара балхаш гойтар зӏамагӏбараша», - дийцар тха газетага.
Иштта цига хержар ӏилман-технически, кхыдолча ӏилмай оагӏонашцарча Халкъашта юкъерча Балтийски инженерни яхьашка дакъа лаца гӏоргбараш. Толашагӏа болча доакъашхоша 2026-ча шерарча саькура бетта Санкт-Петербурге дӏахьоргйолча къамашта юкъерча яхьашка дӏабовзийтаргба вай мохк.
Дешархой проекташка хьожаш хиннараш бар Гӏалгӏай паччахьалкхен университета хьехархой, ӏилманхой, хьурмата оагӏонца къахьегараш.
Белгалде деза, «Толама жӏака тӏа» яха фестиваль берашта юкъе боккха пайда боаржабеш, вай мехка кхоанарча вахаре лоархӏаме йолга.
