Магасе хьаергья Гӏалгӏайчен гӏала кепара 10 метр торт
Гӏалгӏайчен культуран, туризма Министерствос хьаллоацаш, республикан столице йоккха культуран - гастрономически кхетаче дӏахьоргья. Из хоза кхетаче цхьана дӏаяхьа лаьрхӏад «Бутон» яхача зизай моттиго, «Брауни» яхача мерза хӏамаш хьаеча говзанчаша. Дика йовзаш йолча кондитера Цисканаькъан Луизас, цун тоабо 10 метр йоккха торт кийчъергья гӏалгӏай ширача гӏалан кеп йолаш, из я кхозза вӏаштара даьча цӏенга кхоачаш лакха.
Бахархошта бӏаргагуш, из кхоллам хьакхоллаш хургба цига, цхьанкхетаргда бӏаьшерашка денз хьадоагӏа гӏалгӏай ӏадаташ, иштта кондитерий говзал.
Из мерза «гӏишло» нах цецбоахаш йоккха я. Юкъара цун дозал хургда 2,5 тонн, цун кӏийле 2,45 - 2,45 метр йолчара дӏайолалуш я, из лакхехьа хьал мел йода цхьан метрага кхоачаш готтагӏа хургья. Из гӏала хьалъяра кондитерашта эшаргья 5,2 эзар юаш йола мерза «кирпишкаш».
«Сердало» газетага ма аллара, из кхоллам хьабеш дӏадода 380 кийла хьоар, 450 кийла совгӏа шекар, 1,3 тонн шоколад, 11 эзар фуъ.
Россе толам баккха лаьрхӏад ардара бетта 24-ча дийнахьа 14:30 сахьат даьлча Магасе, из болх дӏахьочар цига бех цу исторически хьале дакъа лаца безам бола бахархой.
