Азенаькъан Ӏайнай «Баркал оал» яха байтех латта гуллам бовзийтаргба Магасе
Хьатӏадоагӏача шоатта дийнахьа, Магасерча кагирхой цхьанкхетарий цӏагӏа Азенаькъан Ӏайнай байташта хетаяь сайре дӏахьоргья. Москве арадаьнна «Баркал оал» яха цун керда книжка довзаргда гулбеннарашта.
«Сердалога» из хоам бир мехкарча Къаман библиотека болхлоша. «Азинаькъан Ӏайна филолог, Россе юкъарча дешара лоархӏаме болхло йолаш хьайоагӏа. Мехкарча, иштта Москверча ишколашка хьехархо йолаш къахьегаш я из. Кхоллама наькъ тӏа из яьнна дикка ха я. Цун байташ мехкахошта дика йовзаш я массехк гулламга гӏолла, хӏаьта тахан арадаьнна книжка вахара керда оагӏонаш довзийташ да», - дийцар тха газетага.
Азенаькъан Ӏайнай байташ чӏоагӏа кӏоарга чулоацам болаш, йоазонхошта юкъе оаллача тайпара, дег чура язъяь я. Ма дарра аьлча, сага вахаре нийслуш мел дола хӏамаш белгалдеш, дуненцара ший уйла шерра йоаржаеш кхеллай цо байташ. Байтанчан кхоллам зовне бекаш, моллагӏчун дог сомадоаккхаргдолаш ба. Литератураца кхоачарле лелаераша лакха мах оттабеш къахьегам ба ала йиш я цох.
