МагӀалбике, укх деношка гӏурба деш хиларца, хьаллаьцар бейнача бӀухой дезал
Бусалба наьха деза Гӏурбан денош гаргагӀорташ хиларах, ГӏалгӀайче дика гӀулакхаш дара болх боаржабаьб. Республикан Кулгалхочо Келаматанаькъан Махьмуд-Ӏаьлас тӀадиллача декхарах, ерригача шахьарашка, кхаленашка гӀурбан лаьрхӀа хьайбаш дӀадахьийтар таро йоацача наха. МагӀалбик-Шахьара администраце дика дакъа лоац из деза гӀулакх дӀахьош. Шахьара Ӏаьдало дӀаделар Россе лаьрххӀа йола операци дӀахьош бейнача бӀухой дезалашта лаьрхӀа сагӀа доаккхаш доаде хьайбаш.
«Из сагӀа даккха таро йолаш ба Даьхе бахьан долаш шоай вахар дӀаденнача вай бӀухой дезал, гаргара нах. ГӏалгӀайче Даьхен бӏухой дезалий йоакхо яр керттера декхар да. Езача хана тешшаме а уж юстара бутаргбац», - аьлар «Сердало» газетага МагӀалбика шахьара администраце зарбан болх лелабераша.
Хӏанз дӀахьош дола дика гӀулакхаш вайна хьалхадоахаш да Гӏурба дара керттера мах бараш - сагӀа далар, къахетаме, цхьоагӀо йолаш хилар. Вай Даьхе бахьан долаш, машар гаргабоалабеш, вай кхоане сийрда хилийтара цаӀ санна моастагӀчун духьалъэтта, шоай са Ӏодилла вай бӀухой: воӀ, да, цӀен-да - боацаш бисараш хьаллацар сага къахетам чӀоагӀбеш да. Къаьстта из да цу цӀайна кертте латтар, нах шоайла вӀашагӀтохаш, уж къахетаме беш дар, цар дегаш дӏохадер.
