Кхерамзлен хьалаца дувзаденнарех дийцар Магӏалбике
Терроризм яхача доккхача зулама духьала къовсам лоаттабеча комиссе кхетаче дӏайихьар Магӏалбикерча администраце. Цига гулбеннабар ӏаьдала болхлой, шахьара мэре къахьегамхой, иштта муниципальни моттигашкара кулгалхой.
«Кхетаче дийцар хоржамаш хургдолча моттигашкарча кхерамзленца дувзаденнараш лорадарах, цу гӏулакха геттара терко ярах. Иштта цаӏ долча хоржамий а дешара а Денна, къамий цхьоагӏон Денна хетаяь кхетаченаш дӏахьоча хана, массайола моттигаш лораеш хила езилга, террористически оагӏонцара цхьаккха тайпара зулам хургдоацаш, геттара чӏоагӏа кийчо яь, хьожаш хила безилга белгалдир кхетаче», - йоах тахан «Сердалога» Магӏалбика кхален администрацера бенача хоамо.
Кхетаче белгалдаь декхараш кхоачашдара тӏехьа дикка къахьега дезилгах дийцар гулбеннараша. Къаьстта терко йир терроризма духьала къовсам лоаттабеча комиссе нах гуллуш йолча моттигашкара тӏахьожам чӏоагӏбара. Вахара оагӏонца лоархӏаме йола моттигаш боаггӏача боараме кхерамзлен хьал меттадоаладаь хила еза, иштта фийла хилара тӏахьеха хоам бе беза бахархошка. Магӏалбикерча администрацена кулгал деча Боканаькъан Мухьмада бахархой, хьаьший кхерамзле лораярца кхоачашде дезараш хьалхадаьхар ший болхлошта.
