МагӀалбике дийцар, коммунальни хьалех бола мах дӀабалара дош
МагӀалбик-Шахьара администраце Кулгалхочо Галай Мусас балха кхетаче дӀайихьар, из хетаяь яр шахьара боахама лоархӀамеча хаттарашта - коммунальни хьалех таханарча заман хьисапе мах дӀалуш хилара.
Кхетаче тӀахьехаш яр, декхар гулдара бола болх дика тоабаь дӀабахьара. Цига дакъа лаьцар шахьара таронаш лелаяра викалаша, лораша, дешара моттигий кулгалхоша. Из хаттар каст-каста айдеш да кхетаченашка, хӀана аьлча из кхоачашдарах тийша да шахьара вахара Ӏалашон болх нийса лелабар. Галай Мусас, гулбеннарашка къамаьл деш, терко тӀаяхийтар ерригача ӏаьдала моттигаша шоайла бувзам лелабара. Цо белгалдир, цхьана болх дӀахьош хиларо мара дика толамаш даха таро лургьяц, цунца цхьана коммунальни хьалех дола декхараш а шоай ханнахьа дӏадала таро хургья», - аьлар «Сердало» газетага шахьара администраце зарбан болх лелабераша.
Кхетаче дӀахьош, нах Ӏалашбеча моттигий викалаша гойтар коммунальни декхарех бола хоам. Геттара дукха декхар доалларашта керттера терко тӀаяхийтар. Администраце кулгалхочо белгалдир, из декхар кхоачашдара - шахьара коммунальни боахам цахаддаш болх бе безаш ба, цунца цхьана бахархошта хьалаш а лоаттадеш.
