ӏалбаканаькъан ӏаддал- ӏазита хетаяь Турпала Парта хьайийллар Магӏалбике
Тӏема декхараш кхоачашдеш вахар хаьдача ӏалбаканаькъан ӏаддал-ӏазита сий деш, Турпала Парта хьайийллар Магӏалбикерча № 1 йолча ишколе. Бӏухочун цӏагӏара, гаргара нах юкъе болаш; дукха адам гулделар цига.
«Тӏема аренашка деналца, майралца цӏихеза волаш, ший тӏема декхараш дизза кхоачашдеш лаьттача ӏалбаканаькъан ӏаддал-ӏазитах дийцар ишколе гулбеннараша.
Цига белгалдир, къаман яхь йолча къонгий цӏераш массанена дӏайовзийтар, уж биццабар лоархӏаме долга», - дийцар «Сердалога» кхетаче дӏахьош хиннараша. Турпала Парта хьаелларо вай кхувш латтача къонача тӏехьенна Даьхен бизза бола къонгаш дӏабовзийт. Къаман яхь йолча бӏухой цӏераш йовза еза царна.
Боккхагӏбараша белгалдир, Даьхе езар, цун хӏама лорадар, ший къаманца дувзаденнарех доаккхал деш хилар къонабарашта лоархӏаме хила дезилга. ӏаддал-ӏазита тӏема истори массахана довзаш хургда из дешаш хиннача ишколе, иштта берригача мехка. Из дийна дола, цӏаккха а дицде йиш йоаца истори да.
